દિપડાનો આતંક, બે મહિલાઓને ફાડી ખાધી

Agency, Veraval

વેરાવળ પંથકના ઈશ્વરીયા ગામમાં દિપડાએ આતંક મચાવ્યો છે.

મજૂરી કામ કરીને પેટિયું રળતા મજૂર પરિવારની બે મહિલાઓને દિપડાએ ફાડી ખાતા તેઓનું મૃત્યુ થયું હતું.

ઈશ્વરીયા ગામમાં રાત્રીના સમયે ભાનુબેન રાજુભાઈ પાંડવી અન્ય મહિલાઓ સાથે સૂતા હતા ત્યારે દિપડાએ આવીને હુમલો કર્યો હતો. દિપડો ભાનુબેનને ઝૂંપડાથી દૂર ઘસડી ગયો હતો. જ્યાં દિપડાએ તેમના ગળાના અને માથાના ભાગે ઈજા પહોંચાડતા તેમનું મોત નિપજ્યું હતું.

આ બનાવની જાણ વેરાવળ ફોરેસ્ટને કરી દેવામાં આવી હતી. જ્યાં વન્ય અધિકારીઓએ ઘટના સ્થળે પહોંચી સમગ્ર બનાવની વિગતો મેળવી હતી.

જ્યારે અન્ય એક મહિલાને પણ દિપડાએ ફાડી ખાધા હોવાનું જાણવા મળ્યું હતું. મહારાષ્ટ્રથી મજૂરી કામ માટે આવેલા સુશીલાબેનને પણ દિપડાએ હુમલો કર્યો હતો જેમનું પણ મોત નિપજ્યું હતું.
Source: http://www.divyabhaskar.co.in/2010/02/10/100210181231_leopard_violence_killed_two_women_veraval_gujarat.html