ગીર જંગલ બોર્ડરનાં ગામોને વાંધા- સુચનો રજૂ કરવામાં પડી રહી છે મુશ્કેલી

DivyaBhaskar News Network | Nov 22, 2016, 04:40 AM IST
ઇકો સેન્સેટીવ ઝોનનું નોટીફીકેશન ગુજરાતીમાં પ્રસિદ્ધ કરો

ઇકોસેન્સેટીવ ઝોન અંગેનું નોટીફીકેશન હીન્દીમાં હોય જેથી ગીર જંગલ બોર્ડરનાં ગામોનાં લોકોને વાંધા- સુચનો રજૂ કરવામાં મુશ્કેલી પડી રહી હોય નોટીફીકેશન ગુજરાતી ભાષામાં પ્રસિધ્ધ કરવા ઉનાનાં ધારાસભ્યએ રાજ્યનાં મુખ્ય અધિક સચિવ ( વન અને પર્યાવરણ) ને પત્ર પાઠવી માંગણી કરી છે.

ઉના- ગીરગઢડા વિસ્તારનાં ધારાસભ્ય પુંજાભાઇ વંશએ રાજ્યનાં મુખ્ય અધિક સચિવને પત્ર પાઠવી જણાવ્યું છે કે ભારત સરકારનાં પર્યાવરણ, વન અને જળવાયુ પરિવર્તન મંત્રાલય દ્વારા તા.25 ઓકટો. 2016નાં રોજ ઇકો સેન્સેટીવ ઝોન અંગેનું નોટીફીકેશન બહાર પડાયું છે જે હીન્દી ભાષામાં છેે. નોટીફીકેશન અંતર્ગત ગીર રાષ્ટ્રીય ઉદ્યાન, ગીર વન્ય જીવ અભયારણ્ય સહિતનાં જંગલ વિસ્તારોને આવરી લેવાયા છે. ગીર-સોમનાથ, જૂનાગઢ અને અમરેલી જિલ્લાનાં મોટાભાગનાં ગામડાઓ જંગલ બોર્ડર હદમાં આવેલા છે. નોટીફીકેશન અન્વયે અભયારણ્યોને ઇકો સેન્સેટીવ ઝોનમાં મુકવા માટે લોકો પાસેથી વાંધા-સુચનો મંગાવવામાં આવેલ છે. પરંતુ હિન્દી ભાષામાં નોટીફીકેશન હોય અને લોકો ભાષાથી સાવ અજાણ અને સમજી શકતા હોય તેમજ હિન્દી લખવામાં પણ અતિ મુશ્કેલી પડતી હોય જૂનાગઢ, અમરેલી, તાલાલા, ગીરગઢડા પંથકનાં લોકોમાં જબ્બર વિરોધ સાથે રોષ ઉઠ્યો છે. ત્યારે નોટીફીકેશન સંપુર્ણ પણે ગુજરાતી ભાષામાં પ્રસિધ્ધ કરી લોકો સુધી પહોંચાડવા ધારાસભ્યએ માંગણી કરી છે.