ગિરનાર રોપ-વે મંજૂર ન થાય તો દિલ્હી સુધી પદયાત્રા : મશરૃ.

May 30,2010
જૂનાગઢ, તા.૨૯
જૂનાગઢના પ્રજાજનો માટે મહત્વકાંક્ષી એવી ગિરનાર રોપ વે યોજના વારંવાર અટકી પડે છે ત્યારે હવે દોઢ માસમાં આ યોજના મંજુર નહી થાય તો જૂનાગઢથી દિલ્હી સુધી ૧ર૦૦ કિ.મી.ની પદયાત્રા કરીને એક લાખ સહિઓ સાથેનું આવેદન પત્ર વડાપ્રધાનને પાઠવવાની ચિમકી જૂનાગઢના ધારાસભ્ય મશરૃએ ઉચ્ચારી છે.
ગિરનાર રોપ વે યોજના છેલ્લા દોઢ દાયકા જેટલા સમયથી નિયમોની આંટી ઘૂંટીમાં ફસાતી આવે છે. અને વારંવાર ખાતમૂર્હુતો થયા બાદ પણ આ યોજનાનું કામ ચાલું થતું નથી. ગિરનારને અભયારણ્યનો દરજ્જો મળતા કેન્દ્ર સરકારની મંજુરીનો નવો મુદ્દો આવતા હાલમાં ગુંચવાયેલું સમગ્ર કોકડું કેન્દ્ર સરકાર સમક્ષ પડયું છે. ત્યારે કેન્દ્ર સરકાર આ યોજના મંજુર કરવામાં ઉદાસીનતા દાખવી રહી હોવાની રાવ સાથે જૂનાગઢના ધારાસભ્ય મહેન્દ્ર મશરૃએ દોઢ મહિનાનું અલ્ટિમેટમ આપ્યું છે. અને આ સમયમાં જો રોપ વે યોજના મંજુર નહી થાય તો જૂનાગઢથી દિલ્હી સુધી ૧ર૦૦ કિ.મી. ચાલીને પદયાત્રા કરીને વડાપ્રધાનને આવેદન પત્ર આપવાની ચિમકી સાથે તેઓએ જણાવ્યું છે કે, આ પદયાત્રા દરમિયાન એક લાખ સહિઓ એકત્ર કરીને રજૂઆત કરાશે. તેમજ રજૂઆત વેળાએ ૭૦ વર્ષથી વધુ ઉમરના ૧૦૧ વડીલોને સાથે રાખવામાં આવશે.
Source: http://www.sandesh.com/sandesh_gujarat.aspx

બિગ-બી પાસેથી સિંહોનું ટોળું પસાર થઈ ગયું.

Jitendra Mandavia / Arjun Dangar / Anirudh Nikum,

First Published 00:24 AM [IST](03/06/2010)

Last Updated 3:27 AM [IST](03/06/2010)

૨૦ મીટર દૂર સિંહ પાણી પીતા હોય તેવું શુટિંગ કરાયું

હિન્દી ફિલ્મોનાં બેતાજ બાદશાહ અમિતાભ બચ્ચને બુધવારે વ્હેલી સવારથી જંગલમાં જઇ સિંહો સાથે શુટિંગ કર્યું હતું. સવારે તેમણે એક સાથે ૯ સિંહો સાથે શુટિંગ કર્યું હતું.

બીગ બી ને લઇને વનવિભાગ અને શુટિંગનું આખું યુનિટ સવારે ૬ વાગ્યે કમલેશ્વર ડેમ સાઇટે પહોંચી ગયું હતું. જોકે, ત્યાં તેમને એક જ સિંહ જોવા મળ્યો હતો. આ સ્થળે આવી પહોંચ્યા બાદ કારમાંથી બહાર નીકળતી વખતે તેમણે હળવા મુડમાં એવી ટકોર કરી હતી કે, ‘‘ દેખના મેરી એન્ટ્રી હોને સે હી યે સબ શેર ભાગ જાયેંગે’’.

કમલેશ્વર ડેમ ખાતે તેમણે કુદરતી સૌંદર્યની સાથે સૂર્યોદય પણ નીહાળ્યો હતો. સવારનાં જંગલમાં પક્ષીઓનો કલરવ સાંભળી તેઓ પ્રફૂલ્લિત થઇ ઉઠ્યા હતા. જ્યાં તેમણે ૨ નર, ૨ માદા, ૨ પાઠડા અને ૩ નાના બચ્ચાં એમ એકી સાથે કુલ ૯ સિંહો જોતાં આનંદિત થઇ ગયા હતા. તેમાંયે સિંહો ગેલ ગમ્મત કરતા તેમની અત્યંત નજીક જઇ પહોંચ્યા ત્યારે બીગ બી નાં ચહેરા પર રોમાંચ જોવા મળ્યો હતો. એ સ્થળે તેમણે એક ટુરિસ્ટ તરીકે સિંહ પરિવારને જોવાનો કેવો આનંદ આવે છે એ વ્યક્ત કરતી એડ ફિલ્મનું શુટિંગ કર્યું હતું.

એ વખતે તેમનાં શબ્દો હતા, ‘‘યે વાઇલ્ડ લાઇફ કી તો દુનિયા હી કુછ ઔર હૈ’’.

અહીં અમિતાભ પોતાનાં સાઇબર શોટ કેમેરા વડે સિંહોની ફોટોગ્રાફી કરતા હોય તેવા દ્રશ્યોનું ફિલ્માંકન થયું હતું. શુટિંગ વખતે ત્યાં માત્ર અમિતાભ, એક કેમેરામેન અને જીપ્સીનાં ડ્રાઇવરને જ તેમની પાસે જવાની પરમીશન અપાઇ હતી. શુટિંગ પત્યા બાદ બીગ બી જીપ્સીમાં બેઠા હતા ત્યારે સિંહોનું ટોળું પાણી પી તેમની જીપ્સીની અત્યંત નજીકથી ફરતે આંટો મારી પસાર થયું. એ વખતે તેઓ બોલ્યા ક્યા ખુબસુરત નજારા હૈ.

શુટિંગ બાદ તેમણે અધિકારીઓ સાથે સિંહોની જાળવણીમાં સ્થાનિક પ્રજાનો રોલ શું છે તેની વીગતો મેળવી હતી. અધિકારીઓએ કહ્યું અહીંનાં લોકો સિંહને ભગવાન માને છે. અમિતાભે એ વખતે ગીરનાં લોકોનાં વખાણ કર્યા હતા. સાંજે હિરણ નદી પાસેનાં વિસ્તારનાં લોકેશનો પર શુટિંગ કરાયું હતું.

બિગ બી ને જોવા અઢી કિ.મી. લાંબી ભીડ

અમિતાભ બચ્ચનની એક ઝલક જોવા માટે આજે સાસણમાં અઢી કિ.મી. લાંબા માર્ગ પર લોકોની કતારો લાગી ગઇ હતી. લોકો બપોરે ૩ વાગ્યાથી લઇ સાંજે ૭ વાગ્યા સુધી ઊભા રહ્યા હતા.
Source: http://www.divyabhaskar.co.in/article/SAU-group-of-lions-passed-from-the-close-distance-from-big-b-1023740.html

આવતીકાલે બીગબીની ધમાલ.

Thursday, Jun 3rd, 2010, 3:16 am [IST]

Bhaskar News, Junagadh

બીગ બી આવતીકાલે બપોરે ધમાલનૃત્યમાં ભાગ લેશે. કમલેશ્વર ડેમ સાઇટ ખાતે પણ સવારનાં સમયે વિવિધ પક્ષીઓ અને પ્રાણીઓનું શુટિંગ કરાશે. આવતીકાલે કમલેશ્વર ડેમ સાઇટ પાસે રૂટ નં. ૬ ઉપર પક્ષીઓ અને અન્ય પ્રાણીઓ સાથે શુટિંગ કરનાર છે. અમિતાભ બચ્ચન બપોરે કમલેશ્વર ડેમ સાઇટ ખાતે જ ધમાલ નૃત્યનું શુટિંગ કરશે. તેઓ જાતે તેમાં ભાગ લેશે. ધમાલનાં લીડર ઇમરાન ચોટીયારાને બપોરે બે વાગ્યે ડેમ સાઇટ પાસે તૈયાર રહેવાની સુચનાઓ અપાઇ છે.

ખુશ્બુ ગુજરાત કી એડ ફિલ્મ મુખ્યત્વે બહારનાં રાજ્યોનાં લોકોને અને વિદેશીઓને આકર્ષવા માટે તૈયાર થઇ રહી છે. એટલે તેમાં અમિતાભનાં ડાયલોગ હિન્દી અને ઈંગ્લીશમાં રહે છે. આજે સવારે તેઓ ગીરનાર પર્વત અને જંગલની માહિતી આપતા સંવાદો શુટિંગમાં બોલ્યા હતા. એ શોટ ૨ થી ૩ મીનીટનો રહ્યો હતો.
Source: http://www.divyabhaskar.co.in/2010/06/03/SAU-big-b-will-dance-for-shooting-on-tomorow-1025328.html

હું લોકોની નિર્દોષતા અને ઉત્સાહ જોઇને મલક્યો.

Thursday, Jun 3rd, 2010, 3:05 am [IST]

Bhaskar News, Junagadh

સાસણ ખાતે ગઇકાલે સવારે આવી પહોંચ્યા બાદ બીગ બી એ રાત્રે પોતાનાં બ્લોગમાં દિવસભરનાં અનુભવોનું વર્ણન કર્યું હતું. જેમાં તેમણે પોતાને જોવા ઉભેલા પ્રશંસકો વિશે લખ્યું છેકે, મારી વાટ જોતા અમુક પ્રશંસકોએ મને આવકારવા જે ઉત્સાહ દર્શાવ્યો એ જોઇ હું મારી જાત ઉપર હસ્યો. તેઓને નિરૂત્સાહ કરવા નહીં, પરંતુ તેમની નિર્દોષતા અને ઉત્કટ ભાવના મને સ્પર્શી ગઇ એટલે.

ખરેખર રસ્તા પર ફરતા સામાન્ય માનવીઓ, ગામડામાં વસતા લોકો કેટલા ઉષ્માભર્યા અને દિલેર હોય છે. આપણે શહેરીજનો જીંદગી અને જીવનધોરણની સાદગી મેળવવા આખી જીંદગી ખર્ચી નાંખવી પડે. તેઓ વધુમાં જણાવે છે, આપણે કેવું મહાન રાષ્ટ્ર છીએ. એ માત્ર આવાં સ્થળોની મુલાકાત વખતે જ અનુભવી શકો. અને એ આ ધરતીને સુંદર બનાવનાર શાસનને નહીં પરંતુ શેરીમાં ફરતા સામાન્ય માનવી જ આ રાષ્ટ્રને મજબૂતી અને તેની ભવ્યતા બક્ષે છે.

સિંહ દર્શન અંગેનાં અનુભવમાં તેઓ લખે છે, સ્ટેકર્સ પાર્ટીનો કોલ આવતાં અમે જંગલમાં ઉપડ્યા. અમારી ગાડી ગાઢ જંગલમાં હંકારી. અને પછી અચાનક જ અટકી ગઇ. સ્ટેકર્સ પગપાળા ચાલતા હતા. તેમણે અમને કહ્યું, અમે સિંહની ઘણાં નજીક હતા અને અમારે કેમેરા તૈયાર રાખવા જોઇએ. મેં આજુબાજુની સુકી ઝાડીમાં જોયું પરંતુ કશું દેખાયું નહીં. એક બહાદુર માણસ આગળ ઉભો હતો તેમણે અમને આગળ બોલાવ્યા. શું તેઓ જીપમાં ન બેસી શકે મેં વિચાર્યું. પરંતુ ના, તેને બદલે તેઓ વધુ ધ્યાનાકર્ષક સ્થિતીમાં હતા, જાણેકે અમને ૩ દુલ્હનો દેખાડવા માંગતા ન હોય.

તેઓએ જમણી તરફ હાથ વડે ઇશારો કર્યો અને ત્યાં ૩ સિંહણો હતી. અમે માત્ર ૩૦ ફૂટ દૂર જીપમાં સુરક્ષિત હતા. પરંતુ ચોકીયાતો માંડ ૧૫ ફૂટ દૂર હતા. તેમણે મને કહ્યું જો બચ્ચાંઓને જોવા હોય તો જરા અંદર છે. પરંતુ મેં નર્વસ થઇ તેઓને ઝાડીમાંથી બહાર આવી જવા કહ્યું.
Source: 

યહાં કુછ ફેંકના મત, જંગલ ખરાબ મત કરના.

Arjun Dangar / Anirudh Nakum, Sasan

ગીરનાં જંગલમાં બીગ બી પર્યાવરણ પ્રેમીને છાજે એ રીતની રીતભાત અપનાવી રહ્યા છે. જંગલમાં શુટિંગ વખતે પોતાની મેકઅપ મેનની ટીમનાં એક સભ્યનાં ખીસ્સામાંથી એકાદ બે વસ્તુ બે થી ત્રણ વખત નીચે પડી જતાં બીગ બીનું ધ્યાન તેના તરફ ખેંચાયું હતું. એ વખતે બીગ બી એ ટકોર કરી યહાં કુછ ફેંકના મત. જંગલ ખરાબ મત કરના.

જાણવા મળ્યા મુજબ, શુટિંગમાં તેમનો ક્યાંય પણ રીટેક થયો નથી. બીગ બીની સતત નબળી તબિયતને લીધે તેમની સારસંભાળ તેમનો અત્યંત વિશ્વાસુ શંકર નામનો ૨૭ વર્ષીય યુવાન લે છે.

છેક નાની વયથીજ તેમની સાથે રહેતા અને પડછાયાની માફક રહેતા શંકરે શુટિંગ વખતે વેનીટી વાન સહિતનાં વાહનો ચેક કરવાનાં રહે છે. બીગ બી નાં સવારથી લઇ દિવસભરનાં નિત્યક્રમ વિશેનું તે ધ્યાન રાખે છે. તેને પાણી જોઇએ કે ચા-બિસ્કિટ કે પછી જમવાનું, તમામ બાબતોનો ખ્યાલ શંકર જ રાખે. તે કહે છે, બચ્ચન મોટી પર્સનાલિટી હોવા છતાં ખુબ જ વિનમ્ર છે. અને એકદમ સાદગીભર્યું જીવન જીવે છે. પહેલેથી જ તેઓ બહુ જ ઓછું બોલે છે. જોકે, હવે શુટિંગ વખતે તેઓ ક્યાંક હસી મજાક કરી લે છે ખરા.

બીગબી જંગલમાં પોતાની સાદગી અને વિનમ્રતાનો વન વિભાગ તેમજ પોલીસ સ્ટાફને પરિચય કરાવવા સાથે એક પર્યાવરણપ્રેમીની ભૂમિકા પણ કદાચ બ્રાન્ડ એમ્બેસેડરના ભાગ રૂપે ભજવી રહ્યાં છે.
Source: http://www.divyabhaskar.co.in/2010/06/03/SAU-dont-thrwo-any-waste-in-jungle-says-amitabh-bachchan-to-staff-1025324.html

‘..અને જોયું તો મારા પગ પાસે જ એક કદાવર સિંહણ..’ Sanat Shodhan

(Divyabhaskar)
‘..અને જોયું તો મારા પગ પાસે જ એક કદાવર સિંહણ..’
Sanat Shodhan
ગુજરાતમાં સિંહની વસતી ગણતરી સંપન્ન થઇ ગઇ અને ૪૧૧ સિંહ હોવાનું ગૌરવભેર જાહેર પણ કરાયું. સિંહની વસતીગણતરી વખતે સતત સાથે રહેલા ભારતના ખ્યાતનામ વાઇલ્ડલાઇફ ફોટોગ્રાફર સનત શોધનને થયેલા રોમાંચક અનુભવોની વાત, એમના જ શબ્દોમાં…
આજથી દસ વર્ષ પહેલાં સરિસ્કાના જંગલમાં વાઘની ગણતરી વખતે પૂનમની રાત્રે વાઘ સાથે એક રોમાંચક અનુભવ થયેલો. દસ વર્ષ પછી ક્યારેય ભૂલાય નહીં અને ફરી ક્યારેય થાય નહીં એવો દિલધડક અનુભવ સિંહ ગણતરી વખતે સાસણ ગીરમાં થયો. આ વર્ષે જંગલખાતા તરફથી ૨૪થી ૨૭ એપ્રિલ, ૨૦૧૦ દરમિયાન ફોટોગ્રાફી તથા આધુનિક જીપીએસની મદદથી સિંહની વસતી ગણતરીનું આયોજન કરાયું હતું. નાયબ વન્ય સંરક્ષક સંદીપકુમાર સાહેબે ખૂબ મહેનત કરીને ૧૫૦૦ જેટલા સ્વયંસેવકો માટે બધી જ જાતની સુંદર વ્યવસ્થા કરેલી. ચાર દિવસ ચાલનારી સિંહની ગણતરીમાં સતત જંગલમાં રહીને જીપમાં કે ચાલીને કપરું અને જોખમી કામ કરવાનું હતું.
મારા કમરના દુ:ખાવાને લીધે જરા વિચારમાં પડ્યો કે આ કપરું કામ કેમ પાર પડશે? બીજી જ ક્ષણે થયું કે હવે પછીની ગણતરી પાંચ વર્ષે થશે, ત્યારે તો હું સિત્તેર વટાવી ચૂક્યો હોઇશ અને એમાં ભાગ લેવાનું કદાચ શક્ય ન પણ બને. મેં મનમાં ગાંઠ વાળી: ગમે તે થાય, પણ આ વખતે ગણતરીમાં ભાગ લેવો જ છે. આ મક્કમ નિર્ધાર સાથે મેં ગણતરીમાં ભાગ લીધો. તા. ૨૪ એપ્રિલના દિવસે બપોરે બે વાગ્યાથી શરૂ કરીને બીજા દિવસની બપોરના બે વાગ્યા સુધીના ૨૪ કલાકમાં અમે અગિયાર સિંહ જોયા અને તેની નોંધણી કરી.
૨૬મી તારીખે બપોરે બે વાગે ફરી દેવિળયા ઝોનમાં નીકળ્યા. તરત જ અમે પાંચ સિંહનું ટોળું જોયું. એક સિંહ, બે સિંહણ અને બે બચ્ચાં. ત્યારપછી દર થોડા સમયે અમને સિંહ મળતા રહ્યાં. રાત્રે આઠ વાગે બાબરા ચોકી પાસે દસ સિંહોની પલટન જોવાનો અનેરો લહાવો મળ્યો. જીવનમાં જવલ્લે જ જોવા મળતી સિંહોની આવી કતારનો મન ભરીને આનંદ લૂંટ્યો.
ત્યાંથી નીકળી અમે દોઢ કલાકે ખાંડણીધાર પહોંચ્યા. ત્યાં પહોંચતાની સાથે જ અમે જંગલમાં અંદરની બાજુએ બે સિંહ બેઠેલા જોયા. ઝાડી વચ્ચે બેઠેલા સિંહના ફોટા પાડ્યા પણ જો સિંહ બહાર આવે તો ફોટા પાડવાની વધુ મજા આવે, તે વિચારે અમે થોડે આગળ કાબુડી નાકા પાસે ગયા. ત્યાં બે ચોકીદારો એક પથરાળ ટેકરી ઉપર ઊભા હતા. અમે ટેકરી ચઢી તેમની પાસે ગયા. ટેકરી પાસે જ સિંહ અને બીજા જંગલી જાનવરો માટે પીવાના પાણીના કુંડ હતા.
પેલા બે સિંહ નજીકમાં જ હતા. બંને સિંહોના હાકોટા અને ગર્જનાઓના અવાજ, જંગલની નિરવ શાંતિને ચીરીને દૂર દૂર સુધી સંભળાતા હતા. વાતાવરણમાં પણ એક અકલ્પ્ય ભય તરતો હતો. અનુભવે ચોકીદારોને વિશ્વાસ હતો કે સિંહો પાણી પીવા જરૂર આવશે. અમે તેમની સાથે રોકાયા. અમારા ઉત્સાહી કાટારાસાહેબ આજુબાજુ બીજા સિંહો ક્યાં છે તે શોધવા નીકળી પડ્યા. જેમ જેમ રાત વધતી હતી તેમ તેમ પવનના સુસવાટા અને ઠંડી વધતી હતી.
સાથે સાથે ઝાકળ પડવાનું પણ શરૂ થયું. જંગલની ટાઢ તો જેણે અનુભવી હોય એ જ કહી શકે! વાતાવરણ ખૂબ ઠંડું, ચંદ્રના પ્રકાશમાં ઝળહળતું અને આજુબાજુથી આવતા ચિતલ, સાંબરના ધ્રુજારીભર્યા એલાર્મકોલથી ખૂબ જ રોમાંચક બની ગયેલું. મધરાત બાદ લગભગ અઢી વાગે પેલા બે સિંહ પાણી પીવા આવ્યા. તેમની જીભના પાણી પીવાના અવાજે અમને સૌને ચેતવ્યા. સૌ મીટ માંડીને ચંદ્રના પ્રકાશમાં બંને સિંહોને નિરખતા રહ્યા. થોડીવારે બંને સિંહો પાણી પીને ચાલ્યા ગયા. સૌને હાશ થઇ! આખો દિવસ જંગલમાં ફર્યાના થાકે સૌનો કબ્જો લઇ લીધો. ઊંઘ ન જુએ ઓટલો એમ વિચારીને સૌએ પથ્થરો પર લંબાવવા વિચાર્યું. અહીં જ મારા જીવનનો એક અનન્ય અનુભવ મારી રાહ જોતો હતો…
મને થયું કે જ્યારે ચારેબાજુ સિંહ હોવાની શક્યતા છે તો બધાએ એકસાથે સુવું યોગ્ય નથી જ. મેં કહ્યું ‘તમે સૌ સુઇ જાઓ, હું જાગતો બેઠો છું.’ અમારી સાથેના બે જણ અને ચોકીદારો સૌ સુઇ ગયા. હું બેઠો રહ્યો. કલાક થયો..જંગલ પણ જાણે અંધારાની ચાદર ઓઢીને સૂઇ ગયું હતું. સિંહોની ગર્જના પણ બંધ થઇ હતી. ચિતલ, સાંબરના એલાર્મકોલ્સ પણ બંધ થયેલા. મનેય બે ઘડી ઊંઘ ખેંચી લેવાની ઇચ્છા થઇ આવી.
મન ના પાડતું હતું, પરંતુ શરીર તો હિસાબ માગે ને! હું આડો પડ્યો અને મારી આંખ મળી ગઇ. લગભગ ૧૫થી ૨૦ મિનિટ થઇ હશે અને મારી તંદ્રામાં એક ન કલ્પી શકાય એવો ભાસ થયો કે મારી સામે કોઇ ઊભું છે અને મને ટગરટગર જોયા કરે છે. મેં તરત જ આંખો ખોલી, માથું ઊંચું કર્યું અને જોયું તો મારી સામે, મારા પગ પાસે, મને એકીટસે જોતી એક કદાવર સિંહણ…ધ્રાસકો પડ્યો, હવે શું કરું? પણ ધીરજ ગુમાવી નહીં.
માથું જમીન ઉપર પાછું ટેકવી દીધું. સ્તબ્ધ થઇને પડી રહ્યો. હું અને સિંહણ એકીટસે એકબીજાને જોતાં રહ્યાં. સેકન્ડો કલાકો જેવી લાગવા માંડી. મનમાં થયું કે પ્રભુ આ સિંહણને અહીંથી ખસેડે તો આજુબાજુના લોકોને ઉઠાડું. ભયાનક બીકની સાથે સિંહણને આટલે નજીકથી જોવાનો લહાવો પણ મળ્યો. પ્રભુએ મારી વિનંતી સાંભળી, ને થોડી ક્ષણોમાં સિંહણ ખસીને અમારી બાજુમાં જઇ ઊભી રહી.
મેં હિંમત કરી બાજુમાં સૂતેલા મુકેશભાઇ મહેતાને ધીમેથી કહ્યું, ‘ઊઠો સિંહણ બાજુમાં ઊભી છે.’ પછી ખસીને ચોકીદારને ઉઠાડ્યો અને અમે સૌ પલકારામાં બેઠા થઇ ગયા. ઊભેલી સિંહણને જોઇ રહ્યા અને સાથે સાથે આગળ પાછળ નજર કરી તો બીજી બે સિંહણ અમારી પાછળ થોડે છેટે ઊભેલી. ચોકીદારોની સૂઝ અને અમુક ઢબના અવાજથી પાસે ઊભેલી સિંહણ ચાલીને બીજી સિંહણો સાથે ભેગી મળીને જંગલમાં ચાલી ગઇ.
જંગલમાં જતાં જ ત્રણે સિંહણોએ હાકોટા કરવાની શરૂઆત કરી. આ સાંભળી ચોકીદારે કહ્યું, ‘આપણે સૌ સાથે જ ઊભા રહો. આ સિંહણો પેલા સિંહોને બોલાવે છે અને હમણાં જ સિંહ છલાંગ મારતાં દોડીને સિંહણો પાસે આવી જશે. અને ખરેખર એવું જ થયું! અમે દંગ થઇ જોઇ જ રહ્યા. પલકારામાં પાંચેય સિંહ-સિંહણ જંગલમાં અદ્રશ્ય થયાં.
આ કુદરતની કમાલ અને પ્રભુએ આપેલી આ અકલ્પ્ય યાદગાર ભેટ જિંદગીભર નહીં ભૂલાય! મારા ભાઇ પ્રણવને મેં આ પ્રસંગ વર્ણવ્યો ત્યારે તેણે એક જ વાત કહી કે ‘તારા કુદરત અને વન્ય પ્રાણીઓ પ્રત્યેના અખૂટ પ્રેમને વધાવવા પ્રભુએ તને આશીર્વાદ આપવા આ સિંહણને તારી પાસે મોકલી હશે.’ આવા જિંદગીભરનું ભાથું બને એવા રોમાંચક અનુભવો સાથે એક સાથે ચોત્રીસ સિંહો જોવાનો લહાવો પણ મળ્યો.‘
shodhansj@yahoo.co.in
Source: http://nimpanchal.wordpress.com/2010/05/12/%E2%80%98-%E0%AA%85%E0%AA%A8%E0%AB%87-%E0%AA%9C%E0%AB%8B%E0%AA%AF%E0%AB%81%E0%AA%82-%E0%AA%A4%E0%AB%8B-%E0%AA%AE%E0%AA%BE%E0%AA%B0%E0%AA%BE-%E0%AA%AA%E0%AA%97-%E0%AA%AA%E0%AA%BE%E0%AA%B8%E0%AB%87/

પ્રેયસીને પામવા બે સિંહોની ઈન ફાઈટમાં એક સિંહ ઘાયલ થયો.

May 13,2010
ધારી તા.૧૩
ધારીના છેવાડાના રાજપરા રેન્જમાં એક સિંહની પ્રણયલીલામાં ભંગ પાડવા અન્ય સિંહ આવતા બે સિંહોંની ઈનફાઈટમાં એક સિંહ બૂરી રીતે ઘાયલ થતાં સાસણ વેટરનરી હોસ્પિટલનાં તબીબે તાબડતોબ સારવાર આપી ફરી સિંહને ફરી વનમાં વિચરતો કરી દીધો હતો.
વાઈલ્ડ લાઈફમાં બનેલા રસપ્રદ બનાવની વધુ વિગત મુજબ રાજપરા રાઉન્ડમાં એક સિંહ અને એની પ્રિયતમા પ્રણયલીલામાં મસ્ત હતા. સામાન્ય રીતે આ સિઝનમાં સિંહ અને સિંહણ બન્ને પોતાની જોડી બનાવી લે છે. એ વખતે બીજો સિંહ એમની નવી પ્રિયતમાની શોધમાં હતો. જે આવી ચડતાં એને જોઈને પ્રેમમાં ગળાડૂબ સિંહે એને ખદેડી મૂકવા ઘૂરકિયાં શરૃ કરી દીધા હતા. આમ છતાં સિંહ ન ખસતા સિંહાની ઈનફાઈટ થઈ હતી. આંગતૂક સિંહ બૂરી રીતે ઘાયલ થયો હતો. બરાબર આ જ સમયે વનવિભાગના કર્મચારી પેટ્રોલિંગમાં નીકળ્યા હતા. એને ખબર પડતા ઘાયલ થયેલા સિંહની સારવાર કરવા માટે વ્યવસ્થા કરી હતી. જંગલમાં જ સાસણના વેટરનરી ડોકટરને બોલાવીને સારવાર આપી હતી.
Source: http://www.sandesh.com/sandesh_article.aspx?newsid=186565