ગીર: દેવળીયાના જંગલમાં એક શખ્સે કરી “સલમાનવાળી”.

Source: Bhaskar News, Talala   |   Last Updated 12:28 PM [IST](21/06/2011)

- એક શિકારી ૧૦ કિલો માંસ સાથે ઝડપાયો : છ નાસી છુટયા

- પોલીસમેનની બંદૂકનો ઉપયોગ
ગીર પશ્ચિમનાં દેવળીયા રેન્જના જંગલ વિસ્તાર હેઠળના અમરાપુર (કાઠી) ગામ નજીકના જંગલમાં અવાર નવાર તૃણભક્ષી પ્રાણીઓના શિકાર થતા હોવાની બાતમીના આધારે વનવિભાગે પેટ્રોલીંગ હાથ ધરતા રવિવારની રાત્રીના અમરાપુર કાઠીના જંગલ વિસ્તારમાંથી ચિંકારાના માંસ સાથે એક શખ્સ ઝડપાઇ ગયો હતો.રાત્રીના જંગલમાં બંદુકના ભડાકે ચિંકારાનો શિકાર કર્યો હોવા સાથે શિકારમાં અન્ય છ શખ્સો સામેલ હોય જેમાં શિકાર એક પોલીસમેનની બંદુકથી કરાયો હોવાની વિગત બહાર આવતાં વનવિભાગ ચોંકી ઉઠયું હતું.
શિકાર અંગે વનવિભાગના દેવળીયા રેન્જના આરએફઓ લોરીયાના જણાવ્યા મુજબ તા.૧૯નાં રાત્રીના અમરાપુર (કાઠી)ના જંગલ વિસ્તારમાં પેટ્રોલીંગ કરી રહેલા વનવિભાગના સ્ટાફની નજરે એક શખ્સ પોટલું લઈને જતો નજરે ચડતા તેને અટકાવી પોટલામાં તપાસ કરતા વન્યપ્રાણીનું માંસ હોવાનું જોવા મળતા શખ્સની અટક કરી દેવળીયા રેન્જ ઓફીસે પૂછતાછ માટે લાવવામાં આવેલ જ્યાં પકડાયેલા શખ્સે ગતરાત્રીના જંગલમાં બંદુકના ભડાકે ચિંકારાનો શિકાર કરેલ તે માંસ હોવાનું જણાવતા અધિકારીઓ ચોંકી ઉઠયા હતાં. શિકારનાં માંસ સાથે ઝડપાયેલા શિકારી યુસુફ કાસમ બેલીમ રહે.જુનાગઢ વાળાએ કેફીયત આપેલી કે પોતાની સાથે જુનાગઢના ચાર અને અમરાપુર (કાઠી)નાં બે શખ્સો શિકાર કરવામાં સાથે હતા અને હબીબખાન એમ. પોલીસવાળાની બંદુકથી ફાયરિંગ કરી ચિંકારાનો શિકાર કર્યો હોવાનું જણાવતા અધિકારીઓ હરક્તમાં આવી ગયા હતા.
ભાગી છુટેલા મુંગર મામદ, અનિસ, અનવર, મુગર મામદનો ભાઈ સુલતાન, હબીબખાન એમ(પોલીસવાળો) સાજીદ અથવા સજાદ સહિતનાં શખ્સોને પકડી પાડવા વનવિભાગે દોડધામ શરૂ કરી છે. જંગલ વિસ્તારમાં રાત્રીના બંદુકથી વન્યપ્રાણીના શિકાર થયાની ઘટનાથી ખળભળાટ સર્જાયો છે.
વાડ જ ચીભડા ગળે છે કે શું ?
તૃણભક્ષી પ્રાણીઓનો મજિબાની માટે શિકાર અવાર નવાર જંગલમાં થાય છે ચિંકારાના શિકારની ઘટના દેવળીયા રેન્જના વનવિભાગના સ્ટાફના અમુક લોકોની સંડોવણી હોવાની વાતો પણ વહેતી થઈ છે. જવાબદાર અધિકારીઓ તટસ્થ તપાસ હાથ ધરશે તો ‘વાડ જ ચÃભડા ગળતી હોય તેવુ જોવા મળશે.
Source: http://www.divyabhaskar.co.in/article/SAU-black-deer-hunting-in-devalias-jungle-by-firing-2204909.html