સર્પ જોડીઓ સંવનનમાં રત, પરેશાન ન કરવા અપીલ.

Source: Bhaskar News, Rajula   |   Last Updated 12:50 AM [IST](26/03/2012)

હાલમાં સર્પ માટે સંવનનની સિઝન ચાલી રહી છે. રાજુલા જાફરાબાદ પંથકમાં અનેક સ્થળે સંવનનમાં રત સર્પ જોડીઓ જોવા મળી રહી છે. સર્પ સંરક્ષણ મંડળ દ્રારા લોકોને આવા સાપોને ન મારવા અપીલ કરાઇ છે. રાજુલામાં આ રીતે મળેલા સાપના અનેક બચ્ચાને સલામત સ્થળે મુકત કરાયા હતા.

રાજુલામાં સર્પ સંરક્ષણ મંડળ લોકોમાં સર્પ અંગે જાગૃતિ આવે અને સર્પની સુરક્ષા થાય તે માટે કામગીરી હાથ ધરવામાં આવે છે. સર્પ સંરક્ષણ મંડળના પ્રમુખ અશોકભાઇ સાંખટના જણાવ્યા મુજબ સાપના સંવનનનો સમયગાળો શરૂ થઇ ગયો છે. રાજુલા જાફરાબાદ પંથકમાં અનેક સ્થળે સાપના જોડાઓ સંવનન કરતા નજરે પડી રહ્યાં છે. તેમણે જણાવ્યું છે કે આવનારા દિવસોમાં સાપના નાના બચ્ચાઓ મોટી સંખ્યામાં નજરે પડશે. એક્સાથે ૨૫ થી ૫૦ જેટલા નાના બચ્ચા નજરે પડે તો નવાઇ નહી.

રાજુલામાં આજે વિજ કચેરી નજીક એક્સાથે ૨૦ જેટલા સાપોલીયા નજરે પડ્યા હતા. જેને સલામત રીતે છોડી દેવાયા હતા. મંડળ દ્રારા લોકોને આવા સાપને પરેશાન નહી કરવા અને તેની સુરક્ષા કરવા અપીલ કરાઇ છે. તેમણે એમ પણ જણાવ્યું હતું કે ઉનાળામાં લીલા વૃક્ષ નીચે ભોયરામા, ખાણોમાં બપોરથી લઇ મધરાત સુધીના સમયમાં સાપો સંવનન કરતા નજરે પડી શકે છે.