ચુલડી પાસે સિંહદર્શન કરાવતો માથાભારે શખ્સ ઝડપાયો.

માળિયા હાટિના તા. ૨૮

ગીર વિસ્તારમાં અનાધિકૃત રીતે પ્રવેશી ગેરકાયદે સિંહ દર્શન કરાવવાનો ઉદ્યોગ ખિલ્યો છે. આ વિસ્તારના ગામડામાં રહેતા લોકો વનરાજના જુથને હેરાન પરેશાન કરી આનંદ મેળવે છે. તાલુકાના ચુલડી ગામે રહેતા એક શખ્સે લાયન શો યોજયો છે. એવી વનવિભાગને કોઈએ જાણ કરતા વનવિભાગ ઘટનાસ્થળે પહોંચ્યો હતો આ શખ્સે વન અધિકારી સાથે માથાકૂટ કરતા માળિયાથી પોલીસ બોલાવવી પડી હતી.

• જંગલ વિસ્તારમાં પ્રવેશી અવારનવાર વનરાજોને ખલેલ પહોંચાડતો હોવાની રાવ

માળિયા તાલુકાના બરૂલા ગીર નજીક આવેલા ચુલડી ગામના હમીર ઉકાભાઈ નંદાણિયા નામનો માથાભારે આહેર શખ્સ જામનગર અને જામ ખંભાળિયાના પર્યટકોને સાથે રાખી લાયન શો યોજી સિંહોને બતાવે છે. એવી કોઈએ વન વિભાગને જાણ કરતા માળિયા રેન્જ ફોરેસ્ટનો સ્ટાફ ચુલડીના જંગલ વિસ્તારમાં પહોંચ્યો હતો. આ શખ્સ અવારનવાર સિંહ દર્શન કરાવી રોકડી કરતો હોવાની પણ માહિતી મળી હતી.
 આ વેળા એ વનરાજાને જુદી જુદી રીતે પજવતો હતો. એને વનવિભાગે ટપારતા મામલો બિચકાયો હતો અને વનવિભાગ સાથે બોલાચાલી તેમજ ટપાટપી બોલી ગઈ હતી આથી વનવિભાગના અધિકારીઓએ તાકિદે માળિયા પોલીસને જાણ કરી બોલાવતા પોલીસે આવી હમીરની ધરપકડ કરી બોધપાઠ ભણાવ્યો હતો.
Source: http://www.sandesh.com/article.aspx?newsid=68940