ધારી: હડમતીયામાં મકાનના વાડામાં દિપડો ઘુસ્યો, રેસ્કયુ ટીમ દ્વારા પાંજરે પૂરાયો

• Bhaskar News, Dhari
• Jul 07, 2016, 00:33 AM IST
  
  
  ધારી: ગીર પશ્ચિમના જામવાળા રેંજના ઘાટવડ રાઉન્ડ હડમતીયા ગામે એક મકાનના વાડામા દિપડો ઘુસી ગયો હતો. આ અંગે વનવિભાગને જાણ કરવામા આવતા ધારીથી રેસ્કયુ ટીમ ઘટના સ્થળે દોડી ગઇ હતી અને દિપડાને બેભાન કરી પાંજરે પુર્યો હતો. સુત્રોમાથી જાણવા મળતી વિગત અનુસાર જામવાળા રેંજના ઘાટવડ રાઉન્ડના હડમતીયા ગામે  રહેતા પ્રતાપભાઇના વાડામા દિપડો ઘુસી ગયો હતો. આ અંગે વનવિભાગને જાણ કરવામા આવતા ધારીથી રેસ્કયુ ટીમના ડો. હિતેષ વામજા તથા સ્ટાફના વનરાજભાઇ ધાધલ, પ્રતાપભાઇ ખુમાણ, માનસીંગભાઇ પરમાર સહિત ઘટના સ્થળે દોડી ગયા હતા. 

  
  માથાના ભાગે ઇજા પહોંચતા વાડામાં ઘુસી ગયો હતો

  
  દિપડો મકાનના વાડામા ઘુસી જતા ગ્રામજનોમા ભય ફેલાયો હતો. વનવિભાગે દિપડાને બેભાન કરી પાંજરે પુરી દીધો હતો. વનવિભાગના સુત્રોએ જણાવ્યું હતુ કે આ દિપડો 14 થી 15 વર્ષનો અને ઉંમરલાયક હોય તેમજ માથાના ભાગે ઇજા અને અશકત હાલતમા હોય વાડામા ઘુસી ગયો હતો.