દીપડા ગણતરી : ૩૦૦ કર્મી તૈનાત.

Source: Bhaskar News, Dhari   |   Last Updated 12:31 AM [IST](18/05/2011)

અમરેલી જિલ્લામાં બીજા દિવસે પણ દીપડાની ગણતરી શરૂ
અમરેલી જિલ્લામાં સમગ્ર રાજ્યની સાથે ગઈકાલથી જ દીપડાની વસતી ગણતરીનો પ્રારંભ થયો છે એક દિવસનાં પ્રથમ તબક્કા બાદ આજથી બીજા તબક્કાની ગણતરી શરૂ કરાઈ હતી. ગીર પૂર્વ અને અમરેલી જિલ્લાનાં વિસ્તરણ વિભાગનાં ૩૦૦થી વધુ કર્મચારીઓને આ માટે કામે લગાડવામાં આવ્યાં છે.
અમરેલી જિલ્લામાં જુદા જુદા બે વિભાગમાં દીપડાની વસતી ગણતરી કરવામાં આવી રહી છે. ગીર પૂર્વની વન કચેરી દ્વારા ગીર જંગલ ઉપરાંત ગીર કાંઠાના ધારી ખાંભા, સાવરકુંડલા અને ઊના તાલુકામાં દીપડાની ગણતરી શરૂ કરાઈ છે. જ્યારે વન ખાતાની વિસ્તરણ કચેરી દ્વારા બાકીના તાલુકાઓમાં રેવન્યુ વિસ્તારમાં ગણતરી કરવામાં આવી રહી છે. ગીર પૂર્વના ૧૬૦ અને વન વિસ્તરણના ૧૫૦ મળી ૩૧૦ કર્મચારીને આ માટે ગઈકાલે સાંજથી જ કામે લગાડવામાં આવ્યાં છે. રાતભર કર્મચારીઓએ દીપડાનાં સગડ મેળવવા ઉજાગરા કર્યા હતાં. જો કે કોઈ પોઈન્ટ પર કર્મચારીઓને દીપડો નજરે પડયો ન હતો.
વનવિભાગ દ્વારા પાણીનાં જુદા જુદા પોઈન્ટ પર કર્મચારીઓની ટૂકડી તૈનાત કરવામાં આવી છે. દરેક સ્થળે દીપડાના ફૂટમાર્કનાં આધારે તેની હાજરીની નોંધ કરવામાં આવી હતી. વન કર્મચારીઓ દ્વારા જ્યાં જ્યાં દીપડાનાં ફૂટમાર્ક દેખાય છે ત્યાં ત્યાં ફૂટ પ્રિન્ટ પર કાચ મૂકી પ્રથમ પગના નિશાનનું ચિત્ર દોરવામાં આવે છે. અને બાદમાં તેનું માપ કાગળ પર લઈ લેવામાં આવે છે. આ ઉપરાંત પગનાં નિશાન પર પ્લાસ્ટર ઓફ પેરીસ લગાવી તેના નમુના પણ લેવામાં આવી રહ્યાં છે.
અમુક નિશ્વિત સ્થળે દીપડાનાં ચોખ્ખાં સગડ મળે તે માટે પાણીના પોઈન્ટની આજુબાજુ વનવિભાગ દ્વારા સફાઈ પણ કરવામાં આવી છે. જેથી તેમને સરળતાથી અને ચોખ્ખા ફૂટમાર્ક દેખાયા હતા. ધારીનાં પ્રકૃતપિ્રમી ડૉ.મનુભાઈ ભરાડે જણાવ્યું હતું કે, દરેક દીપડાનાં ફૂટમાર્ક અલગ હોય છે.
Source: http://www.divyabhaskar.co.in/article/SAU-leopard-census-300-officer-arrange-2112008.html