ભેંસના મારણ પેટે મળેલો ચેક પલળી જતાં વનકર્મીઓ પર હુમલો

DivyaBhaskar News Network

Sep 14, 2019, 05:57 AM IST

લીલીયા તાલુકાના ક્રાંકચ ગામે થોડા સમય પહેલા સાવજે ભેંસનું મારણ કરતા વળતર પેટે વનતંત્રએ આપેલો ચેક પલળી ગયો હોય તેના બદલે નવો ચેક માંગવાના મુદે અહિંના બે શખ્સોએ ફોરેસ્ટર અને બિટગાર્ડ પર હુમલો કરી માર મારી વરદી ફાડી નાખી ફરજમાં રૂકાવટ કરતા મામલો પોલીસ મથકે પહોંચ્યો છે. વનકર્મચારી પર હુમલાની આ ઘટના લીલીયા તાલુકાના ક્રાંકચ ગામે બની હતી. અહિં ફોરેસ્ટર તરીકે ફરજ બજાવતા અને હાલમાં અમરેલીમાં રહેતા રાજેશ કનૈયાલાલ જાની અને તેના બીટગાર્ડ નવનીતભાઇ ડેર પર ક્રાંકચના જ મહેશ બાઘા ખુમાણ અને નરેન્દ્ર બાઘા ખુમાણ નામના શખ્સોએ આ હુમલો કર્યો હતો. મહેશ ખુમાણના માલઢોરનું અગાઉ સિંહે મારણ કર્યુ હતું. જેના કારણે તેને વળતર પેટે વનતંત્રએ ચેક આપ્યો હતો. જો કે આ ચેક બેંકમાં જમા કરાવે તે પહેલા તે પલળી ગયો હતો. પરિણામે આ બન્ને શખ્સોએ તેના સ્થાને નવા ચેકની માંગણી કરી હતી. જો કે ફોરેસ્ટરે આ માટે અરજી આપવાનું કહેતા જ બન્ને ઉશ્કેરાઇ ગયા હતાં. બન્નેએ ક્રાંકચમાં બાપા સિતારામના ઓટા પાસે જ તેમને ગાળો દઇ ચેક ફાડી નાખ્યો હતો અને બાદમાં બન્ને બાઇક લઇ જતા હતા ત્યારે ક્રાંકચ નજીક પુલ પાસે બન્નેએ તેમનું મોટર સાયકલ આંતર્યુ હતું અને ગાળો દઇ બન્નેને પછાડી દઇ તેમની વરદી ફાડી નાખી હતી અને ઢીકાપાટુનો માર મારી હવે અહિં કેમ નોકરી કરો છો જોઇ લઇશું તેવી ધમકી આપી હતી. જેને પગલે ફોરેસ્ટરે લીલીયા પોલીસ મથકમાં ફરીયાદ નોંધાવી છે. 
https://www.divyabhaskar.co.in/news/SAU-AMR-OMC-MAT-attack-on-forest-fugitives-found-in-buffalo-slaughter-055717-5476763-NOR.html