ખાંભામાં અનરાધાર વરસાદ વચ્ચે સિંહે રોડ વચ્ચે પશુનો શિકાર કર્યો, ઉનાના જુડવડલીમાં 10 ફૂટની દીવાલ ટપી સિંહે ઘેટાનું મારણ કર્યું

 

• સિંહે બંધ ડેલામાં ત્રાટકી 9 ઘેટાનું મારણ કર્યુ અને એક ઘેટાને ઉપાડી ગયો હતો

ખાંભાના નાની ધારી ગામમાં ગત રાત્રે અનરાધાર વરસાદમાં રસ્તા વચ્ચે ભૂખ્યા સિંહે એક પશુનો શિકાર કરી મિજબાની માણી હતી. આથી રોડની બંને બાજુ વાહનચાલકો થંભી ગયા હતા. સ્ટેટ હાઈવે પર સિંહે પશુને પકડી રાખી મિજબાની માણી હતી. ચાલુ વરસાદમાં રસ્તા વચ્ચે શિકાર કરતા વાહનચાલકોએ આ દ્રશ્યો પોતાના મોબાઈલમાં કેદ કર્યા હતા અને વીડિયો સોશિયલ મીડિયામાં વાઈરલ કર્યો હતો. બીજી તરફ ઉનાના જુડવડલી ગામે 10 ફૂટની દીવાલ ટપી સિંહે ઘેટાનું મારણ કર્યું હતું.

ઉનાના જુડવડલી ગામે સિંહે બંધ ડેલામાં 10 ફૂટની દીવાલ ટપી અંદર ત્રાટકી ઘેટાનું મારણ કર્યુ હતું

35 ઘેટા વચ્ચે સિંહ ત્રાટક્યો હતો
ઉનાના જુડવડલી ગામે 10 ફૂટની દીવાલ ટપી 35 ઘેટા વચ્ચે સિંહ ત્રાટક્યો હતો. આથી ઘેટાઓમાં અફરાતફરી મચી ગઈ હતી. ગામમાં રહેતા ભાવેશભાઈ અરજણભાઈ રબારીના 35 ઘેટા બંધ ડેલામાં બાંધ્યા હતા. રાત્રિના સમયમાં સિંહ દીવાલ ટપી ડેલામાં ત્રાટક્યો હતો. આથી ઘેટાઓ વચ્ચે અફરાતફરીનો માહોલ જોવા મળ્યો હતો. સિંહે 9 ઘેટાનું મારણ કર્યુ અને એક ઘેટાને ઉપાડી ગયો હતો. આજે વહેલી સવારે માલધારીને જાણ થતા તેણે વન વિભાગને જાણ કરી હતી અને ટીમ દોડી આવી હતી. વન વિભાગે સિંહની શોધખોળ હાથ ધરી છે.

(જયદેવ વરૂ, અમરેલી, હિરેન્દ્રસિંહ રાઠોડ, ખાંભા--જયેશ ગોંધિયા, ઉના)

https://www.divyabhaskar.co.in/local/gujarat/junagadh/news/lion-hunt-animal-near-khanbha-on-road-127670989.html