ઝૂ માં 50 હજાર પ્રવાસીઓ, અડધો કિમી ટ્રાફિક

DivyaBhaskar News Network

Aug 26, 2019, 06:35 AM IST

જન્માષ્ટમીની રજાને લઇ રાજ્યભરમાંથી લોકો સોરઠ તરફ આવ્યા છે ત્યારે જૂનાગઢ શહેરમાં બે દિવસથી ટ્રાફિક જોવા મળી રહ્યો છે. જૂનાગઢ શહેરનાં ફરવા લાયક સ્થળો પર મોટી સંખ્યામાં યાત્રાળુઓ ઉમટી પડ્યા હતા. છેલ્લા બે દિવસથી જૂનાગઢ સક્કરબાગ ખાતે ખુબ યાત્રાળુઓ આવ્યા છે. તેમજ શહેરનાં ફરવા લાયક સ્થળોએ પણ પ્રવાસીઓ જોવા મળ્યા હતા. ઉપરકોટ, ભવનાથ, અશોકનો શિલાલેખ સહિતનાં સ્થળોએ મોટી સંખ્યામાં પ્રવાસીઓ આવ્યા હતા. ખાસ કરીને જૂનાગઢનાં સક્કરબાગ ખાતે પ્રવાસીઓ ઉમટતા માર્કેટીંગ યાર્ડ અને મજેવડી ગેઇટ તરફ વાહનોની કતારો લાગી હતી. જૂનાગઢ સક્કરબાગમાં છેલ્લા ચાર દિવસમાં 49917 પ્રવાસીઓએ મુલાકાત લીધી હતી. જેમાંથી ઝૂ ને 14.40 લાખની આવક થઇ હતી.

તહેવારની ટ્રાફિકને કારણે અકસ્માતોના બનાવ વધ્યા

સાતમ આઠમના તહેવારને લઇને જૂનાગઢમાં ભારે ભીડ જોવા મળી હતી. રસ્તા પર દોડતા વાહનોની અવરજવર વધી જતા ટ્રાફિક સર્જાયો હતો જેના કારણે નાના મોટા અકસ્માતો થતા સિવીલ હોસ્પિટલના ચોપડે અસ્માતોના બનાવો વધ્યા છે.

ભવનાથ તળેટીમાં ઠેર ઠેર કચરો |તહેવારને લઇને ભવનાથ ખાતે લોકો ઉમટી પડ્યા હતા અને સાતમ-આઠમ અને રવિવારની રજાને લઇને ભવનાથ તળેટી, વિલીંગ્ડ ડેમ, જટાશંકર સહિતના ફરવા લાયક સ્થળો પર લોકોની ભીડ જોવા મળી હતી. અહીં આવતા લોકો નાસ્તો કરી કચરો જ્યાં ત્યાં ફેકી દેતા હોવાને કારણે ઠેર ઠેર કચરો જોવા મળી રહ્યો છે.
https://www.divyabhaskar.co.in/news/SAU-JUN-OMC-MAT-50-thousand-tourists-in-the-zoo-half-a-km-traffic-063507-5321657-NOR.html