ખાંભા તાલુકાના ભાડ ગામની સીમમાં વીજળીના તારમાં અચાનક શોટસિર્કટ થતાં બે મોરનું ઘટનાસ્થળે જ મોત થયું હતું. વીજશોકથી બન્ને મોરના મૃતદેહ પણ બળી ગયા હતા. અહીં આગલા દિવસે પણ એક મોરનું મૃત્યુ થયાનું કહેવાય છે. વનતંત્રનો નિંભર સ્ટાફ અહીં કલાકો પછી દેખાયો હતો.
ગીર પૂર્વની તુલશીશ્યામ રેન્જમાં ખાંભા તાલુકાના ભાડગામની સીમમાં આ ઘટના બની હતી. અહીં શનિવારે વીજ કંપનીના થાંભલા પર બે મોર બેસવા જતા હતા ત્યારે અચાનક જ બે તાર એકઠા થતાં બન્ને મોરને વીજશોક લાગ્યો હતો.
અહીં બન્ને મોરને વીજળીના એટલા જોરદાર આંચકા લાગ્યા હતા કે પલવારમાં જ મોતને ભેંટયા હતા. એટલું જ નહીં બન્નેના મૃતદેહ પણ તદ્દન બળી ગયા હતા. માત્ર થોડા અવશેષો નીચે પડ્યા હતા. ઘટનાની જાણ થતાં પ્રકૃત્તિ પ્રેમીઓ દ્વારા વનવિભાગના કર્મચારીઓને જાણ કરવામાં આવી હતી પરંતુ કલાકો બાદ બીટગાર્ડ અહીં પહોંચ્યા હતા. બાદમાં વેટરનરી ડોક્ટરોને અહીં બોલાવાયા હતા.
જો કે વનતંત્રને મોરના મૃતદેહને બદલે માત્ર અવશેષો જ મળ્યા હતા. તંત્ર દ્વારા અહીં દાખવાયેલી નિષ્કાળજી સામે રોષે ભરાયેલા પ્રકૃતિપ્રેમીઓએ વનમંત્રી સુધી રજુઆત પણ કરી હતી. એવું પણ કહેવાય છે કે, ગઈકાલે પણ અહીં આજ રીતે એક મોરનું મોત થયું હતું.
Source: http://www.divyabhaskar.co.in/article/SAU-two-peacock-dies-in-elec-1965520.html
No comments:
Post a Comment